Science Courses After Plus Two

 *ശാസ്ത്ര കോഴ്സുകൾക്ക് എക്കാലത്തും ഡിമാൻ്റാണ്. +2 കഴിഞ്ഞവർക്ക് ചേരാവുന്ന ചില ശാസ്ത്ര കോഴ്സുകളെ പരിചയപ്പെടാം.*

ബി.എസ്.സി ഫിസിക്സ്

ഫിസിക്സ്, മാത്തമാറ്റിക്, കെമിസ്ട്രി, എന്നീ വിഷയങ്ങൾ വളരെ ആഴത്തിലും അതോടൊപ്പം കമ്പ്യൂട്ടർ സയൻസ് ഇലക്ട്രോണിക്സ് എന്നിവയിൽ നിന്നുള്ള നിരവധി വിഷയങ്ങൾ കൂടി ഉൾപ്പെടുന്ന മൂന്നുവർഷത്തെ ബിരുദ കോഴ്സ് ആണ് ഇത്. മുകളിൽ പറഞ്ഞ വിഷയങ്ങൾ വിവിധ തൊഴിൽ മേഖലകളിൽ നിത്യേന ഉപയോഗിക്കപ്പെടുന്ന നിരവധി കാര്യങ്ങളെ കുറിച്ചും അതിന്റെ സാധ്യതകളെക്കുറിച്ചും കൂടുതൽ ആഴത്തിൽ പാഠ്യ പദ്ധതിയിൽ ഉൾപ്പെട്ടിട്ടുള്ള ബി.എസ്.സി അപ്ലൈഡ് ഫിസിക്സ് മറ്റൊരു ബിരുദ കോഴ്സ് ആണ്. എയറോസ്പേസ്, മാനുഫാക്ചറിങ്, ഓയിൽ ആൻഡ് ഗ്യാസ്, ടെലികമ്യൂണിക്കേഷൻ എന്നീ മേഖലകളിൽ നിരവധി തൊഴിൽ സാധ്യതകൾ ഈ കോഴ്സ് കഴിഞ്ഞവർക്കുണ്ട്.

ബി.എസ്.സി കെമിസ്ട്രി

രാസപ്രവർത്തനങ്ങളും പദാർത്ഥങ്ങളുടെ രാസഘടനയും  ഉൾപ്പെടെ രസതന്ത്രത്തിന്റെ വിവിധ വശങ്ങൾ പാഠ്യ പദ്ധതിയിൽ ഉൾപ്പെട്ടിട്ടുള്ള മൂന്നുവർഷത്തെ ബിരുദ കോഴ്സ് ആണ് ബി.എസ്.സി കെമിസ്ട്രി. ഫാർമസ്യൂട്ടിക്കൽ കമ്പനികൾ, കെമിക്കൽ ലബോറട്ടറികൾ, വിദ്യാഭ്യാസ സ്ഥാപനങ്ങൾ, കോസ്മെറ്റിക്സ് ആൻഡ് പെർഫ്യൂം കമ്പനികൾ, ഹെൽത്ത് കെയർ ഇൻഡസ്ട്രി തുടങ്ങി വിവിധ മേഖലകളിൽ ഇത്തരം കോഴ്സുകൾ കഴിഞ്ഞവർക്ക് അവസരങ്ങളുണ്ട്. അതോടൊപ്പം ഇതുമായി ബന്ധപ്പെട്ട മറ്റു ബിരുദാനന്തര ബിരുദ കോഴ്സുകൾ പൂർത്തിയാക്കിയാൽ നിരവധി തൊഴിലവസരങ്ങളിലേക്ക് അപേക്ഷിക്കാവുന്നതാണ്.

ബി.എസ്.സി മാത്തമാറ്റിക്സ്

വിവിധ ഗണിത ശാസ്ത്ര വിഷയങ്ങളിൽ താൽപ്പര്യമുള്ള വിദ്യാർഥികൾക്ക് തെരഞ്ഞെടുക്കാവുന്ന മൂന്നുവർഷത്തെ ബിരുദ കോഴ്സ് ആണ് ബി.എസ്.സി മാത്തമാറ്റിക്സ്. ട്രിഗണോമെട്രി, ആൾജിബ്ര, കാൽക്കുലസ്, ഡിഫറെൻഷ്യൽ ജ്യോമെട്രി, ഗ്രാഫ് തിയറി, കോംപ്ലക്സ് അനാലിസിസ്, റിയൽ അനാലിസിസ്, ഡിഫറെൻഷ്യൽ ഇക്വേഷൻസ് തുടങ്ങി ഗണിതശാസ്ത്രവുമായി ബന്ധപ്പെട്ട നിരവധി വിഷയങ്ങൾ ഈ കോഴ്സിന്റെ പാഠ്യ പദ്ധതിയുടെ ഭാഗമാണ്. ബാങ്കിംഗ്, ഫിനാൻസ്, ഇൻഷുറൻസ്, റിസ്ക് മാനേജ്മെന്റ്, വിദ്യാഭ്യാസ സ്ഥാപനങ്ങൾ, സയന്റിഫിക് ഇൻസ്റ്റിറ്റ്യൂട്ട് തുടങ്ങിയ മേഖലകളിൽ നിരവധി തൊഴിലവസരങ്ങൾ ഉണ്ട്.

ബി.എസ്.സി സുവോളജി

അനിമൽ ബയോഡൈവേഴ്സിറ്റി, അനിമൽ ഫിസിയോളജി, ബയോകെമിസ്ട്രി, സെൽ ആൻഡ് മോളികുലർ ബയോളജി, ബയോടെക്നോളജി, ഇക്കോളജി, ജനറ്റിക്സ് & ജിനോമിക്സ്,  എൻവയോൺമെന്റ് മാനേജ്മെന്റ് തുടങ്ങിയ നിരവധി വിഷയങ്ങൾ പാഠ്യപദ്ധതിയുടെ ഭാഗമായിട്ടുള്ള മൂന്നു വർഷ ബിരുദ കോഴ്സ് ആണ് ബി.എസ്.സി സുവോളജി. സുവോളജി അധ്യാപനം, ഫോറൻസിക് എക്സ്പേർട്ട്, വൈൽഡ് ലൈഫ് ബയോളജിസ്റ്റ്, ഇക്കോളജിസ്ററ്, സുവോളജിസ്ററ്, ന്യൂട്രീഷ്യൻ സ്പെഷ്യലിസ്റ്റ്, റിസർച്ച് അസോസിയേറ്റ്, ബയോമെഡിക്കൽ സയൻന്റിസ്റ്റ്, തുടങ്ങി നിരവധി തൊഴിലവസരങ്ങൾ ബി.എസ്.സി സുവോളജി കഴിഞ്ഞവർക്കുണ്ട്. അതോടൊപ്പം നിരവധി ബിരുദാനന്തര ബിരുദ കോഴ്സുകളും പി എച്ച് ഡി ലെവൽ കോഴ്സുകളും ഉണ്ട്.

ബി.എസ്.സി ബോട്ടണി

സസ്യങ്ങൾ, ഫങ്കസ്, ആൽഗകൾ എന്നിവയെക്കുറിച്ചുള്ള ശാസ്ത്രീയ പഠനമാണ് മൂന്നുവർഷത്തെ ബിരുദ കോഴ്സ് ആയ ബി.എസ്.സി ബോട്ടണി. സസ്യങ്ങളുടെ വളർച്ച, ഘടന പുനരുല്പാദനം, ഉപാപചയം, രോഗങ്ങൾ, ഫിസിയോളജി, രാസ സ്വഭാവങ്ങൾ, സസ്യ ശരീരഘടന എന്നിവയെക്കുറിച്ചുള്ള ആഴത്തിലുള്ള പഠനം ഉൾക്കൊള്ളുന്നതാണ് ഈ കോഴ്സ്. തിയറി പഠനത്തോടൊപ്പം തന്നെ വളരെയധികം പ്രാക്ടിക്കൽ പഠനം കൂടി ഉൾക്കൊള്ളുന്നതാണ് ഈ കോഴ്സ്. കാർഷിക ഗവേഷണം, ബൊട്ടാണിക്കൽ സർവ്വേ, ബയോടെക്നോളജി സ്ഥാപനങ്ങൾ, എൻവിയോൺമെന്റൽ  മാനേജ്മെന്റ്, ഫുഡ് ഇൻഡസ്ട്രി, ഹെർബൽ ഇൻഡസ്ട്രി, വൈൽഡ് ലൈഫ് കൺസർവേഷൻ സൊസൈറ്റി, സെന്റർ ഫോർ സയൻസ് എൻവിയോൺമെന്റ്, നേച്ചർ കൺസർവേഷൻ തുടങ്ങി ഗവൺമെന്റ് പ്രൈവറ്റ് മേഖലകളിൽ ഇത്തരം കോഴ്സുകൾ കഴിഞ്ഞവർക്ക് നിരവധി അവസരങ്ങൾ ഉണ്ട്.

ബി.എസ്.സി സ്റ്റാറ്റിസ്റ്റിക്സ്

സ്റ്റാറ്റിസ്റ്റിക്സ്, മാത്തമാറ്റിക്സ് പോലുള്ള വിഷയങ്ങളിൽ താല്പര്യമുള്ളവർക്കും ആ മേഖലയിൽ ഒരു കരിയർ ആഗ്രഹിക്കുന്നവർക്കും തിരഞ്ഞെടുക്കാവുന്ന മൂന്നുവർഷത്തെ ബിരുദ കോഴ്സ് ആണ് ബി.എസ്.സി. സ്റ്റാറ്റിസ്റ്റിക്സ്. പ്രോബബിലിറ്റി ആൻഡ് സ്റ്റാറ്റിസ്റ്റിക്കൽ മെത്തേഡ്സ്, സർവ്വേ സാംപ്ലിങ്, ന്യൂമെറിക്കൽ അനാലിസിസ്, ഡിഫറെൻഷ്യൽ കാൽക്കുലസ്, ഡിഫറെൻഷ്യൽ ഇക്വേഷൻസ്, ഇന്റഗ്രേഷൻ, ഡിമാൻഡ് അനാലിസിസ്, ന്യൂമെറിക്കൽ ഇന്റഗ്രേഷൻ,  ജനറൽ ലീനിയർ മോഡൽസ് തുടങ്ങി നിരവധി വിഷയങ്ങൾ ഇതിന്റെ പാഠ്യ പദ്ധതിയുടെ ഭാഗമാണ്. ബാങ്കുകൾ, ഫൈനാൻസ് സ്ഥാപനങ്ങൾ, സ്കൂൾ,  കോളേജ് അധ്യാപനം, റിസർച്ച് ആൻഡ് ഡെവലപ്മെന്റ് സ്ഥാപനങ്ങൾ, ഇൻഷുറൻസ് കമ്പനികൾ, ട്രേഡിങ് കമ്പനികൾ തുടങ്ങി നിരവധി മേഖലകളിൽ ഇത്തരം കോഴ്സ് കഴിഞ്ഞവർക്ക് അനേകം തൊഴിലവസരങ്ങൾ ഉണ്ട്

ബി.എസ്.സി ഹോം സയൻസ്

മാറുന്ന ചുറ്റുപാടുകൾക്ക് അനുസരിച്ചു വിവിധ ശാസ്ത്ര ശാഖകളുടെ അറിവുകൾ പ്രായോഗിക വൽക്കരിച്ചു കൊണ്ട് വീടും കുടുംബജീവിതവും മുന്നോട്ടു നയിക്കുന്നതിനുവേണ്ടിയുള്ള മൂന്നു വർഷത്തെ പഠനം ആണ് ബി.എസ്.സി ഹോം സയൻസ്. ഈ കോഴ്സ്  പെൺകുട്ടികൾക്ക് മാത്രമായി പരിമിതപ്പെടുത്തിയിരിക്കുന്നു. നിരവധി വിഷയത്തിലുള്ള തിയറി പഠനത്തോടൊപ്പം തന്നെ വിവിധ വിഷയങ്ങളിൽ പ്രായോഗിക പരിശീലനം കൂടി ഉൾപ്പെടുന്നതാണ് ഈ കോഴ്സ്. എൻവയോൺമെന്റൽ സയൻസ്,  റിസോഴ്സ് മാനേജ്മെന്റ്, ഫാബ്രിക്സ് ആൻഡ് അപ്പാരൽ സയൻസ്, ന്യൂട്രീഷൻ ആൻഡ് ഫുഡ്, ഹ്യൂമൻ ഡെവലപ്മെന്റ് തുടങ്ങി നിരവധി വിഷയങ്ങളുടെ തിയറി പഠനവും പ്രായോഗിക പരിശീലനവും ഈ കോഴ്സിൽ ഉൾപ്പെടുന്നു. അപ്പാരൽ ആൻഡ് ഫാഷൻ ഡിസൈൻ,  കമ്മ്യൂണിറ്റി ഡെവലപ്മെന്റ്, കൗൺസിലിംഗ്, ഫുഡ് ഇൻഡസ്ട്രി, ന്യൂട്രീഷനിസ്റ്റ് എന്നീ മേഖലകളിലെല്ലാം ഹോം സയൻസ് കോഴ്സ് കഴിഞ്ഞവർക്ക് തൊഴിലവസരങ്ങൾ ഉണ്ട്. 

ബി.എസ്.സി അഗ്രിക്കൾച്ചർ

ഇന്ത്യയിൽ കാർഷിക ഗവേഷണത്തിനും കാർഷിക സംബന്ധമായ വിദ്യാഭ്യാസത്തിനും ഊന്നൽ നൽകുന്നതിനുവേണ്ടി ഇന്ത്യൻ സർക്കാർ രൂപീകരിച്ചിട്ടുള്ള ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ച് (ഐ സി എ ആർ) അംഗീകരിച്ച നാലുവർഷത്തെ ബി.എസ്.സി അഗ്രികൾച്ചർ കോഴ്സ് നൽകുന്ന നിരവധി കാർഷിക സർവ്വകലാശാലകൾ ഇന്ത്യയിലുണ്ട്. ഈ കാലഘട്ടത്തിൽ ആധുനിക കാർഷിക സാങ്കേതിക വിദ്യകൾ നടപ്പിലാക്കുന്നതിന് പരിശീലനം നൽകുകയാണ് ഈ കോഴ്സ് ലക്ഷ്യമിടുന്നത്. സസ്യ ജനിതക ശാസ്ത്രം, സസ്യ പ്രജനനം, അഗ്രികൾച്ചറൽ മൈക്രോബയോളജി, സോയിൽ സയൻസ്, പ്ലാന്റ് പാത്തോളജി, ഹോർട്ടികൾച്ചർ, ഫോറസ്ട്രി, പ്ലാന്റ് ബയോകെമിസ്ട്രി, ഓർഗാനിക് ഫാമിംഗ്, ഫാം മെഷിനറി, ഡയറി സയൻസ്, പൗൾട്രി പ്രൊഡക്ഷൻ ആൻഡ് മാനേജ്മെന്റ്, സോയിൽ ആൻഡ് വാട്ടർ കൺസർവേഷൻ എൻജിനീയറിങ് തുടങ്ങി നിരവധി വിഷയങ്ങൾ ഈ നാലു വർഷ കോഴ്സിന്റെ പാഠ്യപദ്ധതിയിൽ ഉൾപ്പെടുന്നു. അഗ്രികൾച്ചർ ഓഫീസർ, പ്ലാന്റേഷൻ മാനേജർ, അഗ്രിക്കൾച്ചർ റിസർച്ച് സയൻന്റിസ്റ്റ് തുടങ്ങി നിരവധി തൊഴിൽസാധ്യതകൾ ഗവൺമെന്റ് പ്രൈവറ്റ് മേഖലകളിൽ ഈ കോഴ്സ് കഴിഞ്ഞവർക്കുണ്ട്.

ബി.എസ്.സി ബയോ കെമിസ്ട്രി

ജീവജാലങ്ങളെ കുറിച്ചും ജീവജാലങ്ങളുടെ ആറ്റങ്ങളെയും തന്മാത്രകളെയും രാസ പ്രക്രിയകളെയും അതിന്റെ തത്വങ്ങളെയും കുറിച്ചുള്ള മൂന്നുവർഷത്തെ ശാസ്ത്രീയ പഠനമാണ് ബി.എസ്.സി ബയോ കെമിസ്ട്രി. ബയോളജിക്കൽ സയൻസ്,  കെമിസ്ട്രി,  ബയോ മോളിക്യൂൾസ്, സെൽ ബയോളജി എൻവയോൺമെന്റൽ സ്റ്റഡീസ്, ഇന്റർ മീഡിയറി മെറ്റബോളിസം, അനലിറ്റിക്കൽ ബയോകെമിസ്ട്രി, ഹ്യൂമൻ ഫിസിയോളജി ആൻഡ് ന്യൂട്രീഷൻ പോലുള്ള നിരവധി വിഷയങ്ങൾ ഈ കോഴ്സിന്റെ പാഠ്യപദ്ധതിയിൽ ഉൾപ്പെടുന്നു. ക്ലിനിക്കൽ റിസർച്‌, ബയോകെമിസ്റ്റ്, മെഡിക്കൽ ഇൻഡസ്ട്രി, റിസർച്ച് ലാബ്, അഗ്രികൾച്ചർ, ഫാർമസ്യൂട്ടിക്കൽ കമ്പനി, കോളേജുകളിൽ അധ്യാപനം, തുടങ്ങി നിരവധി തൊഴിലവസരങ്ങൾ ഈ കോഴ്സ് കഴിഞ്ഞവർക്ക് ഉണ്ട്

ബി.എസ്.സി ബയോ ഇൻഫർമാറ്റിക്സ്

ബയോളജി,  കമ്പ്യൂട്ടർ സയൻസ്, ഇൻഫോർമേഷൻ എൻജിനീയറിങ്, മാത്തമാറ്റിക്സ്, സ്റ്റാറ്റിസ്റ്റിക്സ് എന്നീ വിഷയങ്ങളും അവയുടെ പ്രായോഗിക വശങ്ങളും സമന്വയിപ്പിച്ചുകൊണ്ടുള്ള മൂന്നുവർഷത്തെ കോഴ്സ് ആണ് ബി.എസ്.സി ബയോ ഇൻഫർമാറ്റിക്സ്. ബയോളജിക്കൽ ഡാറ്റ മനസ്സിലാക്കുന്നതിനുള്ള രീതികളും സോഫ്റ്റ്‌വെയർ ഉപകരണങ്ങളും വികസിപ്പിക്കുന്ന ഒരു മേഖലയാണിത്. ഈ കോഴ്സുകൾ കഴിഞ്ഞവർക്ക് ബയോ അനലറ്റിക്സ്, ക്ലിനിക്കൽ ഫാർമക്കോളജി, കമ്പ്യൂട്ടേഷണൽ കെമിസ്ട്രി, ഡാറ്റാബേസ് ഡിസൈൻ ആൻഡ് മെയിന്റനൻസ്, ഇൻഫർമാറ്റിക്സ് ഡെവലപ്പർ, ഫാർമക്കോഗണോമിക്സ്, സീക്വൻസ് അനാലിസിസ്, ഹോസ്പിറ്റലുകൾ, ഡയഗ്നോസ്റ്റിക് സെന്ററുകൾ എന്നീ മേഖലകളിലെല്ലാം തന്നെ അനവധി അവസരങ്ങൾ ഉണ്ട്.

ബി.എസ്.സി  കമ്പ്യൂട്ടർ സയൻസ്

കമ്പ്യൂട്ടറുമായി ബന്ധപ്പെട്ട അടിസ്ഥാനതത്ത്വങ്ങൾ മുതൽ ഏറ്റവും പുതിയ സാങ്കേതികവിദ്യകളെയും ട്രെൻഡുകളെയും കുറിച്ചുള്ള പഠനം ഉൾപ്പെടുന്ന മൂന്നുവർഷത്തെ ബിരുദ കോഴ്സ് ആണ് ബി  എസ് സി കമ്പ്യൂട്ടർ സയൻസ്. ഡാറ്റാബേസുകളെ കുറിച്ചും അതിന്റെ വിശകലനത്തെ കുറിച്ചും വിശദമായി ഈ കോഴ്സിൽ പഠിക്കുന്നു. വിവിധ പ്രോഗ്രാമിംഗ് ലാംഗ്വേജുകൾ, വിവിധ ഓപ്പറേഷൻ സിസ്റ്റംസ്, നെറ്റ്‌വർക്കിംഗ് സിസ്റ്റംസ്, വെബ് ഡിസൈൻ ആൻഡ് ഡെവലപ്മെന്റ്, മൊബൈൽ ആപ്ലിക്കേഷൻ ഡെവലപ്മെന്റ്, ഓപ്പൺ സോഴ്സ് സോഫ്റ്റ്‌വെയറുകൾ തുടങ്ങിയ നിരവധി വിഷയങ്ങൾ ഈ കോഴ്സിന്റെ പാഠ്യപദ്ധതിയിൽ ഉൾപ്പെടുന്നു.ഐടി കമ്പനികൾ, വലിയ സ്ഥാപനങ്ങളുടെ ഐടി ഡിപ്പാർട്ട്മെന്റുകൾ, വിവിധ ഗവൺമെന്റ് സ്ഥാപനങ്ങൾ, സ്കൂൾ കോളേജുകൾ, റിസർച്ച് സ്ഥാപനങ്ങൾ, ബാങ്കിങ് സ്ഥാപനങ്ങൾ, സെക്യൂരിറ്റിയുമായി ആയി ബന്ധപ്പെട്ട സ്ഥാപനങ്ങൾ തുടങ്ങിയ മേഖലകളിൽ സോഫ്റ്റ്‌വെയർ എൻജിനീയർ, സോഫ്റ്റ്‌വെയർ ഡെവലപ്പർ, സിസ്റ്റം ആർക്കിടെക്ട്, വെബ്ബ് ഡവലപ്പർ, മൊബൈൽ ആപ്പ് ഡെവലപ്പർ, വെബ് ഡിസൈനിങ്, നെറ്റ്‌വർക്ക് എൻജിനീയർ, ഡാറ്റ അനലിസ്റ്റ് തുടങ്ങിയ നിരവധി ഒഴിവുകളിലേക്ക് ജോലി സാധ്യതയുണ്ട്.

ബി.എസ്.സി ഇൻഫോർമേഷൻ ടെക്നോളജി

ഇൻഫർമേഷൻ ടെക്നോളജിയും അതുമായി ബന്ധപ്പെട്ട നിരവധി വിഷയങ്ങളും പാഠ്യ പദ്ധതിയിൽ ഉൾപ്പെട്ട മൂന്നുവർഷത്തെ ബിരുദ കോഴ്സ് ആണ് ബി.എസ്.സി ഇൻഫർമേഷൻ ടെക്നോളജി. ഇൻഫർമേഷൻ പ്രോസസിംഗ് ആൻഡ് മാനേജ്മെന്റ് ആണ് പ്രധാനമായും ഈ കോഴ്സിൽ അടങ്ങിയിട്ടുള്ളത്. വിവിധ നെറ്റ് വർക്കുകൾ, സോഫ്റ്റ്‌വെയർ ഡെവലപ്മെന്റ് ആൻഡ് ടെസ്റ്റിംഗ്, ഇൻഫർമേഷൻ ഡാറ്റാബേസസ്, വിവിധ പ്രോഗ്രാമിങ് ലാംഗ്വേജുകൾ, വെബ് പ്രോഗ്രാമിങ്, കമ്പ്യൂട്ടർ ഓർഗനൈസേഷൻ ആൻഡ് ആർക്കിടെക്ചർ, ഇന്റർനെറ്റ് എൻവയോൺമെന്റ്, പ്രോജക്ട് മാനേജ്മെന്റ് തുടങ്ങിയ നിരവധി വിഷയങ്ങൾ ഈ കോഴ്സിന് പാഠ്യപദ്ധതിയിൽ ഉൾപ്പെടുന്നു. ബിഗ് ഡാറ്റ, സൈബർ സെക്യൂരിറ്റി, ക്ലൗഡ് കമ്പ്യൂട്ടിംഗ്, മൊബൈൽ ആൻഡ് വയർലസ് ടെക്നോളജി, ഐടി ഇൻഫ്രാസ്ട്രക്ചർ മാനേജ്മെന്റ്, മൊബൈൽ ആപ്ലിക്കേഷൻ ഡെവലപ്മെന്റ് തുടങ്ങിയവയിൽ നിന്ന് ചില വിഷയങ്ങൾ ഇലക്ടീവ് ആയി തെരഞ്ഞെടുക്കാനും സാധിക്കുന്നതാണ്. ഐടി സപ്പോർട്ട് അനലിസ്റ്റ്, നെറ്റ്‌വർക്ക് എൻജിനീയർ, ഐടി കൺസൾറ്റന്റ്, വെബ് ഡിസൈനർ, സോഫ്റ്റ്‌വെയർ ഡെവലപ്പർ, ക്വാളിറ്റി അനലിസ്റ്റ്, പ്രോഗ്രാം, ടെക്നോളജി എൻജിനീയർ, ടെക്നിക്കൽ കൺസൾട്ടന്റ് എന്നിങ്ങനെ നിരവധി ഒഴിവുകളിലേക്ക് ഇത്തരം കോഴ്സുകൾ കഴിഞ്ഞാൽ സാധ്യതകളുണ്ട്.

ബി.എസ്.സി ഇലക്ട്രോണിക്സ്

ഇലക്ട്രോണിക് സംബന്ധമായ നിരവധി അടിസ്ഥാന വിഷയങ്ങൾ വളരെ ആഴത്തിൽ അടങ്ങിയിട്ടുള്ള മൂന്നുവർഷത്തെ ബിരുദ കോഴ്സ് ആണ് ബി.എസ്.സി ഇലക്ട്രോണിക്സ്. ഇലക്ട്രോണിക്സ് ഉപകരണങ്ങളുടെ ഡിസൈനിങ്ങിലും നിർമ്മാണത്തിലും സർവീസിങ്ങിലും താല്പര്യമുള്ളവർക്ക് തെരഞ്ഞെടുക്കാവുന്ന ഒരു കോഴ്സാണിത്. വിവിധ ഇലക്ട്രോണിക് കമ്പോണന്റുകൾ, ഇന്റഗ്രേറ്റഡ് സർക്യൂട്ട് അനലോഗ് ഇലക്ട്രോണിക്സ്, വിവിധ പ്രോഗ്രാമിംഗ് ലാംഗ്വേജുകൾ, മാത്തമാറ്റിക്സ്,  സ്റ്റാറ്റിസ്റ്റിക്സ്,  നെറ്റ് വർക്ക് അനാലിസിസ്, ക്വാണ്ടം മെക്കാനിക്സ്, സിഗ്നൽസ് തുടങ്ങിയ നിരവധി വിഷയങ്ങൾ ഈ കോഴ്സിന് ഭാഗമായി പഠിക്കാൻ ഉണ്ടാകും. ഐടി കമ്പനികൾ, ഇലക്ട്രോണിക്സ് ഡിവൈസ് മാനുഫാക്ചറിങ് കമ്പനികൾ, സോഫ്റ്റ്‌വെയർ ഡെവലപ്മെന്റ് കമ്പനികൾ എന്നിവയിൽ സർവീസ് എഞ്ചിനീയർ, ബ്രോഡ് കാസ്റ്റ് ആൻഡ് സൗണ്ട് ടെക്നീഷ്യൻ, ഇലക്ട്രോണിക് സെയിൽസ്, ഇലക്ട്രോണിക്സ് ആൻഡ് കമ്യൂണിക്കേഷൻ കൺസൾറ്റൻന്റ് തുടങ്ങിയ നിരവധി തൊഴിലവസരങ്ങൾ ഉണ്ട്.

ബി.എസ്.സി ന്യൂട്രീഷ്യൻ ആൻഡ് ഡയറ്ററ്റിക്സ്

ന്യൂട്രീഷ്യൻ, ഡയറ്ററ്റിക്സ്  സയൻസ് എന്നീ മേഖലകളിലെ നിരവധി വിഷയങ്ങൾ ഉൾക്കൊള്ളുന്ന മൂന്നുവർഷത്തെ ബിരുദപഠനം ആണ് ഇത്, ഭക്ഷണം തയ്യാറാക്കൽ, സമീകൃതാഹാരത്തിന്റെ ഘടകങ്ങൾ, ഭക്ഷണ ശീലങ്ങൾ, ലൈഫ്സ്റ്റൈൽ മാനേജ്മെന്റ് തുടങ്ങി ഫുഡ് സയൻസ് മാനേജ്മെന്റ് ഡയറ്റ് മാനേജ്മെന്റ് എന്നിവയെല്ലാം ഉൾക്കൊള്ളുന്ന പഠന ശാഖയാണിത്. ഹ്യൂമൻ ഫിസിയോളജി, ഫുഡ് ന്യൂട്രിഷൻ, ഫുഡ് കെമിസ്ട്രി, പബ്ലിക് ഹെൽത്ത് ആൻഡ് ന്യൂട്രീഷ്യൻ, മദർ ആൻഡ് ചൈൽഡ് ഹെൽത്ത്, ന്യൂട്രിഷണൽ ബയോകെമിസ്ട്രി, ഫുഡ് മൈക്രോബയോളജി, ഫാമിലി മീൽ ആൻഡ് ഡയറ്റ് പ്ലാനിങ്, ഫുഡ് പ്റിസർവേഷൻ തുടങ്ങി നിരവധി വിഷയങ്ങൾ ഇതിന്റെ പാഠ്യപദ്ധതിയിൽ ഉൾപ്പെടുന്നു. ഗവൺമെന്റ് പ്രൈവറ്റ് മേഖലകളിൽ ഹോസ്പിറ്റലുകൾ, ക്ലിനിക്കുകൾ, ഫുഡ് കമ്പനികൾ, ഭക്ഷണവുമായി ബന്ധപ്പെട്ട ഗവേഷണ സ്ഥാപനങ്ങൾ, തുടങ്ങി നിരവധി മേഖലകളിൽ ഈ പഠനം പൂർത്തിയാക്കിയവർക്ക് തൊഴിലവസരങ്ങൾ ഉണ്ട്

ബി.എസ്.സി ഫുഡ് ടെക്നോളജി

ഭക്ഷണപദാർത്ഥങ്ങളുടെ നിർമ്മാണം, സംസ്കരണം, അവ കേടുകൂടാതെ സൂക്ഷിക്കൽ തുടങ്ങിയ വിവിധ കാര്യങ്ങളുടെ പഠനം ഉൾക്കൊള്ളുന്ന മൂന്നുവർഷത്തെ ബിരുദ കോഴ്സ് ആണ് ബിഎസ് സി  ഫുഡ് ടെക്നോളജി. എൻജിനീയറിങ്, ഫുഡ് സയൻസ്, ഹോട്ടൽ മാനേജ്മെന്റ്, ഹോം സയൻസ്, എന്നിങ്ങനെ നിരവധി വിഷയങ്ങളുടെ ഒരു സങ്കലനമാണ് ഈ കോഴ്സ്. ഫുഡ് പ്രോസസിംഗ്, ഫുഡ് കെമിസ്ട്രി, ഫുഡ് മൈക്രോബയോളജി, ഫുഡ് ഹൈജീൻ, മിൽക്ക് പ്രോസസിംഗ് ഫുഡ് ലോസ് ആൻഡ് ക്വാളിറ്റി അഷ്വറൻസ്, ബേക്കറി ആൻഡ് കൺഫെക്ഷനറി പ്രോഡക്ട്സ്, പാക്കേജിങ് ഫ്രഷ് ആൻഡ് പ്രോസെസ്സഡ് ഫ്രൂട്ട്സ്, ഫുഡ് പാക്കേജിങ് തുടങ്ങിയ നിരവധി വിഷയങ്ങൾ ഈ കോഴ്സിന്റെ പാഠ്യപദ്ധതിയിൽ ഉൾപ്പെടുന്നു. ക്വാളിറ്റി അഷ്വറൻസ് കമ്പനികൾ, ഫുഡ് പ്രൊഡക്ഷൻ കമ്പനികൾ, ഫുഡ് ലോജിസ്റ്റിക്സ് കമ്പനികൾ, റിസർച്ച് ആൻഡ് ഡെവലപ്മെന്റ് സെന്ററുകൾ, ഹോട്ടലുകൾ തുടങ്ങി നിരവധി സ്വകാര്യ പൊതുമേഖലാ സ്ഥാപനങ്ങളിൽ തൊഴിലവസരങ്ങൾ ഉണ്ട്.

ബി.എസ്.സി ഫോറൻസിക് സയൻസ്

കുറ്റകൃത്യങ്ങളുടെ അന്വേഷണത്തിനായി ശാസ്ത്രീയമായ അറിവുകൾ നേടാനും അത് പ്രായോഗികമായി ഉപയോഗിക്കാനും താല്പര്യമുള്ളവർക്ക് തെരഞ്ഞെടുക്കാവുന്ന മൂന്നുവർഷത്തെ ബിരുദ കോഴ്സ് ആണ് ബി.എസ്.സി ഫോറൻസിക് സയൻസ്. ശാസ്ത്രീയമായ അന്വേഷണങ്ങൾ വഴി ഒരു കുറ്റകൃത്യം നടന്ന സ്ഥലത്തുനിന്നു ആവശ്യമായ തെളിവുകൾ ശേഖരിച്ചു വിശകലനം ചെയ്യുക എന്നുള്ളതാണ് ഇത്തരം കോഴ്സുകൾ കഴിഞ്ഞവർ ചെയ്യുന്ന ജോലി. ഫോറൻസിക് പാത്തോളജി, സൈക്യാട്രി ഫോറൻസിക് മെഡിസിൻ, ഫോറൻസിക് ഡെന്റിസ്ട്രി, ടോക്സിക്കോളജി, ബാലിസ്റ്റിക്സ്, സയൻസ് ഓഫ് സിംഗർ പ്രിന്റിംഗ് തുടങ്ങിയ നിരവധി വിഷയങ്ങൾ ഈ കോഴ്സിന്റെ പാഠ്യ പദ്ധതിയിൽ ഉൾപ്പെടുന്നു. പോലീസ് ഡിപ്പാർട്ട്മെന്റ്, ഗവൺമെന്റ് ഫോറൻസിക് ലബോറട്ടറി, ഇൻകം ടാക്സ് ആൻഡ് കൊമേഷ്യൽ ടാക്സ് ഡിപ്പാർട്ട്മെന്റ്, ക്രൈംബ്രാഞ്ച്, ഇന്റലിജൻസ് ബ്യൂറോ, സിബിഐ, തുടങ്ങി സ്വകാര്യ, പൊതു മേഖലകളിലെ വിവിധ വകുപ്പുകളിൽ തൊഴിൽ സാധ്യതകൾ ഉണ്ട്.

ബി.എസ്.സി  ഫോറസ്ട്രി

വനവൽക്കരണവുമായി ബന്ധപ്പെട്ട വിവിധ വിഷയങ്ങളിൽ തിയറി പഠനത്തോടൊപ്പം പ്രായോഗിക പരിശീലനവും കൂടി ഉൾപ്പെടുന്ന നാലുവർഷത്തെ ഡിഗ്രി കോഴ്സ് ആണ് ബി.എസ്.സി ഫോറസ്ട്രി. കേരള അഗ്രികൾച്ചർ യൂണിവേഴ്സിറ്റിയുടെ കീഴിൽ തൃശൂർ കേന്ദ്രമായി പ്രവർത്തിക്കുന്ന കോളേജ് ഓഫ് ഫോറസ്ട്രി ആണ് പ്രധാനമായും കേരളത്തിൽ ഈ കോഴ്സ് നൽകുന്നത്. പ്രവേശന പരീക്ഷയിൽ യോഗ്യത നേടുന്ന ആൺകുട്ടികൾക്കും പെൺകുട്ടികൾക്കും പ്രവേശനം ലഭ്യമാണ്. ഇതിന്റെ പാഠ്യപദ്ധതിയിൽ ക്ലാസ് റൂം പഠനം കൂടാതെ ആറു മാസത്തോളം നീണ്ടു നിൽക്കുന്ന പ്രായോഗിക പരിശീലനം കൂടി ഉൾപ്പെടുന്നു. വനമേഖലയിൽ താമസിച്ച് വിവിധ വന അധിഷ്ഠിത വ്യവസായങ്ങളോടും സംഘടനകളോടും സമ്പർക്കം പുലർത്തുക, വന പരിശീലനകേന്ദ്രത്തിൽ ശാരീരിക പരിശീലനം, പ്രഥമ ശുശ്രൂഷ, സായുധ പരിശീലനം എന്നിവയെല്ലാം ഉൾപ്പെടുന്ന ക്യാമ്പസ് പരിശീലന പരിപാടികൾ അവസാന സെമസ്റ്ററിൽ ഉൾപ്പെടുന്നു. സുവോളജിക്കൽ പാർക്കുകൾ,  വൈൽഡ് ലൈഫ് റേഞ്ച്, വൈൽഡ് ലൈഫ് റിസർച്ച് സ്ഥാപനങ്ങൾ, ഇന്ത്യൻ കൗൺസിൽ ഓഫ് ഫോറസ്ട്രി റിസർച്ച് ആൻഡ് എജുക്കേഷൻ, വൈൽഡ് ലൈഫ് ഡിപ്പാർട്ട്മെന്റുകൾ തുടങ്ങി നിരവധി മേഖലകളിൽ തൊഴിലവസരങ്ങൾ ഉണ്ട്. ഡിഗ്രി പഠനത്തിനു ശേഷം വിവിധ വിഷയങ്ങളിൽ ബിരുദാനന്തരബിരുദവും പി എച്ച് ഡി ലെവൽ പ്രോഗ്രാമുകളും ഉണ്ട്.

ബി.എസ്.സി മൈക്രോബയോളജി

മൈക്രോ ഓർഗാനിസവുമായി ബന്ധപ്പെട്ട ശാസ്ത്രീയ പഠനമാണ് മൂന്നുവർഷത്തെ ബി എസ് സി മൈക്രോബയോളജി. വിവിധതരത്തിലുള്ള ബാക്ടീരിയകൾ, വൈറസുകൾ, ഫംഗസുകൾ തുടങ്ങിയ സൂക്ഷ്മ ജീവികളെ കുറിച്ച് വിശദമായി ഈ കോഴ്സിൽ പഠിക്കുന്നു. ഫിസിക്സ്,  കെമിസ്ട്രി, മൈക്രോബിയൽ ഇക്കോളജി, ബയോകെമിസ്ട്രി, മോളികുലർ ബയോളജി, സെൽ ബയോളജി, ഇമ്മ്യൂണോളജി, അനാലിറ്റിക്കൽ ബയോകെമിസ്ട്രി, വൈറോളജി തുടങ്ങിയ നിരവധി ശാസ്ത്രശാഖകൾ ഈ കോഴ്സിന്റെ പാഠ്യ പദ്ധതിയിൽ ഉൾപ്പെടുന്നു. തിയറി പഠനത്തോടൊപ്പം തന്നെ നിരവധി ലാബ് അധിഷ്ഠിത പ്രാക്ടിക്കൽ കൂടി ഉൾപ്പെടുന്നതാണ് ഇതിന്റെ സിലബസ്. ഗവൺമെന്റ്, പ്രൈവറ്റ് ഹോസ്പിറ്റലുകൾ, ഫുഡ് ഇൻഡസ്ട്രി, റിസർച്ച് സ്ഥാപനങ്ങൾ, കെമിക്കൽ ഇൻഡസ്ട്രി, ഫാർമസ്യൂട്ടിക്കൽ ഇൻഡസ്ട്രി തുടങ്ങിയ മേഖലകളിൽ നിരവധി തൊഴിലവസരങ്ങൾ ഉണ്ട്.

ബി.എസ്.സി നോട്ടിക്കൽ സയൻസ്

കപ്പൽ പോലുള്ള സമുദ്രത്തിലൂടെ സഞ്ചരിക്കുന്ന വാഹനങ്ങൾ സുരക്ഷിതമായി പ്രവർത്തിപ്പിക്കുന്നതിനും നാവിഗേറ്റു ചെയ്യുന്നതിനും അറിവും പ്രായോഗിക പരിശീലനവും നൽകുന്ന മൂന്നുവർഷത്തെ കോഴ്സ് ആണ് ബി എസ് സി നോട്ടിക്കൽ സയൻസ്. ചെന്നൈ ആസ്ഥാനമായ ഇന്ത്യൻ മാരിടൈം യൂണിവേഴ്സിറ്റിയുടെ കീഴിൽ ചെന്നൈ, മുംബൈ, കൊൽക്കത്ത, വിശാഖപട്ടണം, കൊച്ചിൻ എന്നിവിടങ്ങളിൽ പ്രവർത്തിക്കുന്ന റീജണൽ ക്യാമ്പസുകളിൽ ആണ് പ്രധാനമായും ബി എസ് സി നോട്ടിക്കൽ സയൻസ് കോഴ്സ് ഉള്ളത്. ഇന്ത്യൻ മാരിടൈം യൂണിവേഴ്സിറ്റി നടത്തുന്ന ഇംഗ്ലീഷ്, ജനറൽ ആപ്റ്റിറ്റ്യൂഡ്, ഫിസിക്സ് കെമിസ്ട്രി മാത്തമാറ്റിക്സ് എന്നീ വിഷയങ്ങൾ ഉൾക്കൊള്ളുന്ന കോമൺ എൻട്രൻസ് ടെസ്റ്റ് വഴിയാണ് ഇതിലേക്കുള്ള പ്രവേശനം. ഇന്ത്യൻ മാരിടൈം യൂണിവേഴ്സിറ്റി വിവിധ റീജിയണൽ ക്യാമ്പസുകളിലൂടെ ബി എസ് സി നോട്ടിക്കൽ സയൻസ് കൂടാതെ നോട്ടിക്കൽ സയൻസ്, മറൈൻ എഞ്ചിനീയറിംഗ്, നേവൽ ആർക്കിടെക്ചർ, ഓഷ്യൻ എൻജിനീയറിങ്, ഷിപ്പ് ബിൽഡിങ് ആൻഡ് റിപ്പയർ, മാരിടൈം മാനേജ്മെന്റ് തുടങ്ങിയ വിഷയങ്ങളിൽ ബിരുദ, ബിരുദാനന്തര, പി എച്ച് ഡി കോഴ്സുകളും നടത്തുന്നുണ്ട്. ബി എസ് സി നോട്ടിക്കൽ സയൻസ് കോഴ്സ് കഴിഞ്ഞവർക്ക്, ഡെക്ക് കേഡറ്റ്, സെക്കൻഡ് ഓഫീസർ ചീഫ് ഓഫീസർ, ക്യാപ്റ്റൻ, ഓഷ്യാനോഗ്രഫർ, റേഡിയോ ഓഫീസർ, നോട്ടിക്കൽ സർവേയർ തുടങ്ങി നിരവധി തസ്തികകളിലേക്ക് തൊഴിലവസരങ്ങൾ ഉണ്ട്.

ബി.എസ്.സി സൈക്കോളജി

മനുഷ്യരുടെ മാനസിക പ്രക്രിയകൾ, വികാരങ്ങൾ, പ്രതികരണങ്ങൾ, അതിന്റെ കാരണങ്ങൾ, പ്രതിസന്ധി ഘട്ടങ്ങൾ കൈകാര്യം ചെയ്യൽ, ഒരുകൂട്ടം ആളുകളുടെ ചിന്ത, പ്രചോദനം, മനുഷ്യ മനസ്സിന്റെ സ്വഭാവം തുടങ്ങിയ നിരവധി കാര്യങ്ങൾ പാഠ്യ പദ്ധതിയിൽ ഉൾപ്പെട്ടിട്ടുള്ള മൂന്നുവർഷത്തെ പഠനമാണ് ബി എസ് സി സൈക്കോളജി. മനുഷ്യ മസ്തിഷ്കത്തിന്റെ വിവിധ തലങ്ങളിലുള്ള ആശയങ്ങളെയും ഓരോ സാഹചര്യങ്ങളിലും  അതിന്റെ പ്രവർത്തനങ്ങളെയും അനന്തരഫലങ്ങളെയും പറ്റിയുള്ള വിശദമായ പഠനം ഈ കോഴ്സിൽ ഉൾപ്പെടുന്നു. മോട്ടിവേഷൻ, ഇമോഷൻ, സ്ട്രെസ് ആൻഡ് വെൽബീയിങ്, കോഗ്നിഷൻ, മെമ്മറി, എൻഡോക്രൈൻ സിസ്റ്റം, ഫങ്ക്ഷനിങ് ഓഫ് നേർവസ് സിസ്റ്റം, ഹൈപോതെസിസ്, ക്വാളിറ്റേറ്റീവ് ആൻഡ് ക്വാണ്ടിറ്റേറ്റീവ് അനാലിസിസ്, ഇമോഷണൽ ആൻഡ് സോഷ്യൽ ഡെവലപ്മെന്റ്, കൾച്ചർ ആൻഡ് ഹ്യൂമൻ ഡെവലപ്മെന്റ്, ആറ്റിട്യൂട്, പേഴ്സണാലിറ്റി, കൾച്ചറൽ സൈക്കോളജി, ഗ്രൂപ്പ് ആൻഡ് ലീഡർഷിപ് തുടങ്ങിയ നിരവധി വിഷയങ്ങൾ ബി എസ് സി സൈക്കോളജി കോഴ്സിന്റെ പാഠ്യ പദ്ധതിയിൽ ഉൾപ്പെടുന്നു. ഡിഗ്രി പഠനത്തിനു ശേഷം ബിരുദാനന്തര ബിരുദം, പി എച്ച് ഡി ബിരുദം എന്നിവയ്ക്കും അവസരങ്ങളുണ്ട്. എൻജിഒകൾ, ഓൾഡ് ഏജ് ഹോംസ്, റീഹാബിലിറ്റേഷൻ സെന്ററുകൾ, ഹോസ്പിറ്റലുകൾ, കൗൺസിലിംഗ് സെന്ററുകൾ, സ്കൂൾ കോളേജ് തലങ്ങളിൽ അധ്യാപനം തുടങ്ങി വിവിധ തൊഴിൽ അവസരങ്ങൾ ഈ കോഴ്സ് കഴിഞ്ഞവർക്ക് ഉണ്ട്.

ബി.എസ്.സി ജനറ്റിക്സ്

ജീവജാലങ്ങളുടെ പാരമ്പര്യത്തെക്കുറിച്ച് അതിലെ വ്യതിയാനങ്ങളെ കുറിച്ചും ശാസ്ത്രീയമായി പഠിക്കുന്ന മൂന്നുവർഷത്തെ ബിരുദ കോഴ്സ് ആണ് ബി എസ് സി ജനറ്റിക്സ്. വിവിധ ജീവജാലങ്ങളുടെ ഒരു തലമുറയിൽ നിന്നും മറ്റൊരു തലമുറയിലേക്ക് ഉള്ള ജനിതക മാറ്റങ്ങളെക്കുറിച്ച് വിശദമായി പഠിക്കുന്ന കോഴ്സാണിത്. ഫാർമസ്യൂട്ടിക്കൽ ഇൻഡസ്ട്രി, റിസർച്ച് സ്ഥാപനങ്ങൾ, ഹോർട്ടികൾച്ചർ സ്ഥാപനങ്ങൾ, ജനറ്റിക് ടെസ്റ്റിംഗ് ലാബുകൾ, ഹോസ്പിറ്റലുകൾ, അഗ്രികൾച്ചറൽ ഫാമുകൾ, ഫുഡ് പ്രോസസ്സിംഗ് ഇൻഡസ്ട്രി, വിദ്യാഭ്യാസ സ്ഥാപനങ്ങളിൽ അധ്യാപനം തുടങ്ങി നിരവധി മേഖലകളിൽ ഇത്തരം കോഴ്സുകൾ കഴിഞ്ഞവർക്ക് അവസരങ്ങൾ ഉണ്ട്.

ബി.എസ്.സി ജിയോഗ്രഫി

ഭൂമിയെയും അതിലെ പല പ്രദേശങ്ങളെയും ഓരോ പ്രദേശങ്ങളുടെ സവിശേഷതകൾ (മണ്ണിന്റെ തരം, പ്രത്യേകതകൾ കാലാവസ്ഥ), നിവാസികൾ, പ്രതിഭാസങ്ങൾ തുടങ്ങിയവയെക്കുറിച്ച് പഠിക്കുന്ന പഠനശാഖയാണ് ജോഗ്രഫി. മൂന്നു വർഷമാണ് ബി.എസ്.സി ജോഗ്രഫി കോഴ്സിന്റെ ദൈർഘ്യം. ഗവൺമെന്റ്- ഗവൺമെന്റിതര മേഖലകളിലെ പ്രശസ്തമായ സ്ഥാപനങ്ങൾ, സ്കൂളുകൾ, കോളേജുകൾ,  യൂണിവേഴ്സിറ്റികളിലും മറ്റും ഗവേഷണം, അർബൻ പ്ലാനിങ്, റിമോട്ട് സെൻസിംഗ് പോലുള്ള നിരവധി മേഖലകളിൽ അനേകം തൊഴിലവസരങ്ങൾ ബി.എസ്.സി ജോഗ്രഫി കഴിഞ്ഞവർക്കുണ്ട്.

ബി.എസ്.സി ആക്ച്ചൂറിയൽ സയൻസ്

ഇൻഷൂറൻസ് റിസ്ക് ആൻഡ് പ്രീമിയം എന്നിവയുടെ കണക്കുകൂട്ടൽ ഇൻഷൂറൻസ് നിക്ഷേപത്തിൽ തീരുമാനമെടുക്കൽ, ഫിനാൻഷ്യൽ പ്ലാനിങ് ആൻഡ് മാനേജ്മെന്റ് തുടങ്ങിയ മേഖലകളിൽ വളരെയധികം സാധ്യതകളുള്ള മൂന്നുവർഷ ബിരുദ കോഴ്സാണിത്. റിസ്ക് മാനേജ്മെന്റ്, ഫോർകാസ്റ്റിംഗ് തിയറി, കമ്പ്യൂട്ടർ അസിസ്റ്റഡ്  റിസർച്ച്, ഡാറ്റ അനാലിസിസ്, എക്കണോമിക് റിസ്ക്സ്  തുടങ്ങിയ നിരവധി വിഷയങ്ങൾ ഇതിന്റെ പാഠ്യപദ്ധതിയിൽ ഉൾപ്പെടുന്നു. ഇൻഷുറൻസ് കമ്പനികൾ, ഗവൺമെന്റ് ഡിപ്പാർട്ട്മെന്റുകൾ, കൺസൾട്ടൻസി സ്ഥാപനങ്ങൾ,  അധ്യാപനം തുടങ്ങിയ മേഖലകളിലെല്ലാം ഇത്തരം കോഴ്സ് കഴിഞ്ഞവർക്ക് തൊഴിലവസരങ്ങൾ ഉണ്ട്.