കേരള എൻട്രൻസിന് വിവിധ വിഭാഗക്കാർ അപേക്ഷയോടൊപ്പം അപ്‌ലോഡ് ചെയ്യേണ്ട സർട്ടിഫിക്കറ്റുകൾ,സീറ്റ് വിഭജനം....

*ക്രീമിലെയറിൽ അല്ലെന്ന് തെളിയിക്കാൻ*

കേരള എൻട്രൻസ് പരീക്ഷയിൽ പിന്നാക്ക വിഭാഗക്കാർ സംവരാണാനുകൂല്യം ലഭിക്കാൻ നിർദിഷ്ട നിബന്ധനപ്രകാരം നോൺക്രീമിലെയർ (മേൽത്തട്ടിലല്ലെന്ന) സർട്ടിഫിക്കറ്റ് ഹാജരാക്കണം. പ്രോസ്‌പെക്‌ടസിന്റെ 11–ാം അനുബന്ധത്തിലെ പിന്നാക്ക സമുദായ ലിസ്‌റ്റിലെ (പേജ് 145, 146) ഏതു വിഭാഗത്തിൽപ്പെടുന്നുവെന്നും വ്യക്തമാക്കിയിരിക്കണം. സംവരണാർഹതയുള്ള ക്രിസ്ത്യൻ വിദ്യാർഥികൾ ഏത് ഉപവിഭാഗമെന്നു വ്യക്തമാക്കുന്ന സർട്ടിഫിക്കറ്റാണ് അപ്‌ലോഡ് ചെയ്യേണ്ടത്. സംവരണം കിട്ടാൻ മറ്റർഹസമുദായക്കാരും (ഒഇസി) മേൽത്തട്ടിലല്ലെന്ന രേഖ നൽകണം. ഓരോ തരത്തിലുമുള്ള സംവരണം ലഭിക്കുന്നതിന് പ്രോസ്പെക്ടസിൽ നിർദേശിച്ചിട്ടുള്ള സർട്ടിഫിക്കറ്റുകൾ യഥാസമയം അപ്‌ലോഡ് ചെയ്യണം. പട്ടികവിഭാഗക്കാർ തഹസിൽദാർ നൽകിയ ജാതിസർട്ടിഫിക്കറ്റാണ് ഹാജരാക്കേണ്ടത്.

*സീറ്റു വിഭജനം*

എംബിബിഎസ്, ബിഡിഎസ് സർക്കാർ സീറ്റുകളുടെ 15% അഖിലേന്ത്യാ ക്വോട്ടയായി നീക്കിവച്ചിരിക്കുന്നു. അഗ്രി / വെറ്ററിനറി / ഫിഷറീസ് / സർവകലാശാലകളിലെ കോഴ്സുകൾക്കുമുണ്ട് അഖിലേന്ത്യാ വിഹിതം. കേന്ദ്ര – സംസ്‌ഥാന സർക്കാരുകളുടെ നോമിനികൾക്കും മറ്റുമുള്ള സംവരണ സീറ്റുകൾ വേറെ. 

സ്‌പോർട്‌സ്, എൻസിസി, വിമുക്‌തഭട ക്വോട്ട, കർഷകരുടെ മക്കൾ തുടങ്ങിയ വിശേഷ സംവരണ വിഭാഗങ്ങൾക്കു നീക്കിവയ്‌ക്കുന്ന സീറ്റുകൾ ഇവയ്‌ക്കു പുറമേ. 

ഇവ കഴിച്ച് സർക്കാർ / എയ്‌ഡഡ് / സർക്കാർ കോസ്റ്റ്–ഷെയറിങ് എൻജി കോളജുകളിലേക്കു അലോട്ട് ചെയ്യുന്ന സീറ്റുകളിൽ കോഴ്‌സ് തിരിച്ച് 5% ഭിന്നശേഷിക്കാർക്കായിവകയിരുത്തും. 

മേൽ സൂചിപ്പിച്ചവയും മാനേജ്‌മെന്റ് ക്വോട്ടയും ഒഴികെയുള്ള സീറ്റുകളിലേക്കു മെറിറ്റ് – സംവരണ മാനദണ്ഡങ്ങൾ പാലിച്ച്, കുട്ടികളുടെ താൽപര്യവും പരിഗണിച്ച്, തിരഞ്ഞെടുപ്പു നടത്തി, അവരെ വിവിധ കോഴ്‌സുകളിലേക്ക് / സ്‌ഥാപനങ്ങളിലേക്ക് ഓൺലൈനായി അലോട്ട് ചെയ്യും. ഓപ്ഷൻ സമർപ്പണത്തിനു മുൻപ് സീറ്റുകളുടെ കൃത്യസംഖ്യ ഇനം തിരിച്ച് അറിയാം.

*വിശേഷശ്രദ്ധ വേണ്ട പത്തു കാര്യങ്ങൾ*

1.സ്‌പോർട്‌സ് ക്വോട്ടക്കാർ ഓൺലൈൻ അപേക്ഷയുടെ അക്നോളജ്മെന്റ് പേജും പ്രസക്തരേഖകളും സ്‌പോർട്‌സ് കൗൺസിലിന് യഥാസമയം അയച്ചുകൊടുക്കണം.

2.എൻസിസി ക്വോട്ടക്കാർ ഓൺലൈൻ അപേക്ഷയുടെ അക്നോളജ്മെന്റ് പേജും പ്രസക്തരേഖകളും യൂണിറ്റ് ഓഫിസർക്ക് യഥാസമയം സമർപ്പിക്കണം. അവ എൻസിസി ഡയറക്ടറേറ്റിലേക്ക് അയച്ചുകൊള്ളും.

3.മെഡിക്കൽ / ഡെന്റൽ ഉൾപ്പെടെ ന്യൂനപക്ഷപദവിയുള്ളവയടക്കം എല്ലാ സ്വകാര്യ / സ്വാശ്രയ / ഓട്ടോണമസ് കോളജുകളിലെയും എൻആർഐ സീറ്റുകളും ന്യൂനപക്ഷ ക്വോട്ട സീറ്റുകളും അലോട്ട് ചെയ്യുന്നത് എൻട്രൻസ് കമ്മിഷണറാണ്. സൈറ്റിൽ പറഞ്ഞിട്ടുള്ള രേഖകൾ അപേക്ഷയുടെ ഭാഗമായി അപ്‌ലോഡ് ചെയ്യണം.

4.കേരള കാർഷിക സർവകലാശാലയിലെ അഗ്രി എൻജിനീയറിങ്, ഫുഡ് ടെക്നോളജി / വെറ്ററിനറി സർവകലാശാലയിലെ ഡെയറി ടെക്നോളജി, ഫുഡ് ടെക്നോളജി / ഫിഷറീസ് സർവകലാശാലയിലെ ഫുഡ് ടെക്നോളജി ബിടെക് പ്രോഗ്രാമുകളിൽ മാത്രം പ്രവേശനം വേണ്ടവർ എൻജിനീയറിങ് എൻട്രൻസ് പരീക്ഷയാണ് എഴുതേണ്ടത്.

5.സ്‌പെഷൽ റിസർവേഷൻ ആഗ്രഹിക്കുന്നവരും എൻട്രൻസ് പരീക്ഷ എഴുതണം.

6.പട്ടികവിഭാഗക്കാർ ജാതിസർട്ടിഫിക്കറ്റ് തഹസിൽദാരിൽ നിന്നു വാങ്ങണം

7.പരീക്ഷയുടെ സിലബസ് പ്രോസ്‌പെക്‌ടസിലുള്ളതു നോക്കി തയാറെടുക്കുക.

8.മൊബൈൽ നമ്പറും ഇ മെയിൽ ഐഡിയും വിദ്യാർഥിയുടെയോ രക്ഷിതാക്കളുടെയോ ആയിരിക്കണം

9എൻജിനീയറിങ്ങിനു സീറ്റുകളേറെയുണ്ടെങ്കിലും ഇഷ്‌ടപ്പെട്ട കോളജും കോഴ്‌സും കിട്ടണമെങ്കിൽ ഉയർന്ന റാങ്ക് നേടിയേ മതിയാകൂ. പ്ലസ്‌ടുവിലും എൻട്രൻസിലും നല്ല പ്രകടനത്തിനു പരിശീലിക്കുക.

10. കേരള എൻട്രൻസുമായി ബന്ധപ്പെട്ട് 2 വെബ്സൈറ്റുകളുണ്ട്.

(1) പൊതുവിവരങ്ങൾക്ക്: www.cee-kerala.org.

(2) ഓൺലൈൻ അപേക്ഷയ്‌ക്കും ഓപ്‌ഷൻ സമർപ്പണത്തിനും: www.cee.kerala.gov.in.

ഫോൺ: 155300 & 0471-2335523 / 2525300; പുതിയ അറിയിപ്പുകൾക്ക്:ceekinfo.cee@kerala.gov.in

സാമുദായിക സംവരണക്രമം

∙സംസ്‌ഥാന മെറിറ്റ് – 50%. (സാമ്പത്തിക പിന്നാക്കം 10%, ഈഴവ 9%, മുസ്‌ലിം 8%, മറ്റു പിന്നാക്ക ഹിന്ദു 3%, ലത്തീൻ കത്തോലിക്കരും ആംഗ്ലോ–ഇന്ത്യക്കാരും 3%, ധീവര 2%, വിശ്വകർമ 2%, കുശവ 1%, മറ്റു പിന്നാക്ക ക്രിസ്‌ത്യാനി 1%, കുടുംബി 1%, പട്ടികജാതി 8%, പട്ടികവർഗം 2% (സാമുദായിക സംവരണം ആകെ 40%).

∙പാലക്കാട് സർക്കാർ മെഡിക്കൽ കോളജ് ( ഇവിടെ 70% സീറ്റുകൾ പട്ടികജാതിക്കും 2% പട്ടികവർഗത്തിനും)

∙സംവരണം എങ്ങനെ(സംവരണ സമുദായക്കാരിൽ ഉയർന്ന റാങ്കുകാരെ മെറിറ്റിൽ ഉൾപ്പെടുത്തും. അത്രതന്നെ മെറിറ്റില്ലാത്തവർക്കാണു സാമുദായിക സംവരണം. ക്രീമിലെയറിൽ പെടാത്ത പിന്നാക്ക വിഭാഗക്കാർക്കു സംവരണമുണ്ട്. ദമ്പതികളിൽ ഒരാളെങ്കിലും പിന്നാക്കജാതിയിൽപെട്ട മിശ്രവിവാഹിതരുടെ കുട്ടികൾക്കും സംവരണം ലഭിക്കും. പക്ഷേ, ഇവരും നോൺ ക്രീമിലെയർ സർട്ടിഫിക്കറ്റ് സമർപ്പിക്കണം. പട്ടികവിഭാഗ സംവരണത്തിനു വരുമാനപരിധിയില്ല.)

*ആരാണ് കേരളീയർ?*

കേരളീയനെന്നു തെളിയിക്കാൻ താഴെ പറയുന്നവയിൽ ഒരു രേഖ അപ്‌ലോഡ് ചെയ്യണം.

1. ജനനസ്‌ഥലം കേരളത്തിലാണെന്നു കാട്ടുന്ന എസ്‌എസ്‌എൽസി പേജിന്റെ പകർപ്പ്.

2. അച്ഛനമ്മമാരിൽ ഒരാളെങ്കിലും കേരളത്തിൽ ജനിച്ചെന്നുള്ള എസ്‌എസ്എൽസി പകർപ്പും മകൻ / മകൾ ആണെന്ന സർട്ടിഫിക്കറ്റും.

3. അപേക്ഷകനോ അച്ഛനോ അമ്മയോ കേരളത്തിൽ ജനിച്ചെന്ന പാസ്‌പോർട്ട് പകർപ്പ്. അച്ഛന്റെയോ അമ്മയുടെയോ പാസ്‌പോർട്ടാണെങ്കിൽ മകൻ / മകൾ ആണെന്ന രേഖ

4. വിദ്യാർഥിയോ അച്ഛനോ അമ്മയോ കേരളത്തിൽ ജനിച്ചതാണെന്നു വില്ലേജ് ഓഫിസർ നിർദിഷ്‌ട ഫോർമാറ്റിൽ നൽകിയ സർട്ടിഫിക്കറ്റ്. അച്ഛന്റെയോ അമ്മയുടെയോ ജനനസർട്ടിഫിക്കറ്റാണെങ്കിൽ, മകൻ / മകൾ ആണെന്ന സർട്ടിഫിക്കറ്റും (പ്രോസ്പെക്ടസിന്റെ 35–ാം അനുബന്ധത്തിൽ ഇതിന്റെ ഫോർമാറ്റുണ്ട്).

5. രക്ഷിതാവ് കേരളത്തിലേക്ക് അലോട്ട് ചെയ്‌ത അഖിലേന്ത്യാ സർവീസ് ഓഫിസറാണെന്ന രേഖ (അനുബന്ധം 35 എ).

*കേരളീയരല്ലാത്തവർ 2 തരം*

∙ഒന്നാം കാറ്റഗറി: സായുധസേനാംഗങ്ങളടക്കം കേരളത്തിൽ സേവനമനുഷ്‌ഠിക്കുന്ന കേന്ദ്രസർക്കാർ ജീവനക്കാർ, കേരള സർക്കാരിൽ 2 വർഷമെങ്കിലും സേവനമനുഷ്‌ഠിച്ചിട്ടുള്ള കേരളീയല്ലാത്ത ജീവനക്കാർ എന്നിവരുടെ കുട്ടികൾ. 11, 12 ക്ലാസുകൾ കേരളത്തിൽ പഠിച്ചിരിക്കണം. ഇക്കാര്യങ്ങൾ ഓഫിസ് മേധാവി / പ്രിൻസിപ്പൽ നിർദിഷ്ട ഫോമിൽ സാക്ഷ്യപ്പെടുത്തണം. കഴിഞ്ഞ 12 വർഷക്കാലത്തിൽ 5 വർഷമെങ്കിലും വിദ്യാർഥി കേരളത്തിൽ താമസിച്ചിരുന്നാലും മതി. ഇതു വില്ലേജ് ഓഫിസർ ഫോമിൽ സാക്ഷ്യപ്പെടുത്തണം. 8 മുതൽ 12 വരെ ക്ലാസുകൾ കേരളത്തിൽ പഠിച്ചവരും ഈ വിഭാഗത്തിൽപ്പെടും. ഇക്കാര്യം നിർദിഷ്ടഫോമിൽ പ്രിൻസിപ്പൽ സാക്ഷ്യപ്പെടുത്തണം. സ്‌റ്റേറ്റ് മെറിറ്റ് സീറ്റുകളിലേക്കു മാത്രം പരിഗണിക്കും; സംവരണാനുകൂല്യമില്ല.

∙രണ്ടാം കാറ്റഗറി: കേരളീയരല്ലാത്തവരിൽ, ഒന്നാം കാറ്റഗറിയിൽപ്പെടാത്തവർ. പ്ലസ്ടു കോഴ്സ് പൂർത്തിയാക്കിയെന്ന് പ്രിൻസിപ്പലിന്റെ സർട്ടിഫിക്കറ്റ് വേണം. ഇന്ത്യക്കാരനെന്നു തെളിയിക്കാൻ പാസ്പോർട്ടിന്റെ പകർപ്പ് സ്വീകരിക്കും. സർക്കാർ നിയന്ത്രിത സ്വാശ്രയ എൻജിനീയറിങ് കോളജുകളിലെയും സ്വകാര്യ സ്വാശ്രയ എൻജി / ആർക്കി / ഫാർമസി / സിദ്ധ / യുനാനി കോളജുകളിലെയും സർക്കാർ / മാനേജ്‌മെന്റ് സീറ്റുകളിലും പ്രവേശനത്തിന് നിബന്ധനകൾക്കു വിധേയമായി അർഹതയുണ്ട്.